«Алтын мөнбәр» кинофестивале географиясен киңәйтә: 66 илдән 1 030 дан артык фильм кабул ителде

Казанда уздырылачак XXII халыкара кинофестиваль быел 4 нән 8 сентябрьгә кадәр дәвам итәчәк. Республика Мәдәният министрлыгында оештыручылар кабул ителгән гаризаларның нәтиҗәләрен тәкъдим иттеләр.

Татарстан мәдәният министры урынбасары Дамир Натфуллин сүзләренчә, кинофорумга кызыксыну елдан-ел арта һәм ул яңа рекордлар урнаштыра. Бәйге дирекциясенә дөньяның 66 иленнән 1 030 нан артык киноәсәр җибәрелгән. Катнашучылар арасында гадәти тулы метражлы һәм анимация фильмнарыннан тыш, вертикаль форматтагы эшләр дә бар. Шулай ук быел фестиваль тарихында тәүге тапкыр Венесуэла, Бруней һәм Того вәкилләренең кинокартиналары тәкъдим ителә.

Дамир Натфуллин билгеләп үткәнчә, катнашучылар географиясенең киңәюе – форумның яңа кыйтгаларга чыгуын һәм чын мәгънәсендә глобаль мәйданчыкка әверелүен күрсәтә.

Тантаналы ачылыш тантанасында Рамил Төхфәтуллин төшергән «Укытучы» фильмы күрсәтеләчәк. Әлеге лента күренекле татар галиме Шиһабетдин Мәрҗани тормышына багышланган. Төп бәйгенең жюри составына Ираннан килгән режиссер Мәҗит Мәҗиди җитәкчелек итәчәк. Мәҗидиның 2015 елда чыккан «Мөхәммәд – Аллаһы Тәгалә Илчесе» фильмы махсус программаларның берсендә тәкъдим ителәчәк.

Барлыгы фестиваль программасына 146 киноәсәр кертелгән. Аларны «Корстон» комплексы һәм «Мир» кинотеатры экраннарында карарга мөмкин булачак. Казан Кремлендә «Этник кино» дип исемләнгән махсус программа оештырыла. Ул Россия халыклары бердәмлеге елына багышлана һәм әкият-риваятьләргә нигезләнгән фильмнардан торачак.

Милли кино бәйгесе традицион номинацияләрне үз эченә ала: иң яхшы тулы метражлы, документаль, кыска метражлы һәм балалар фильмы. Моннан тыш, быел тәүге тапкыр иң яхшы милли сериал да билгеләнәчәк. Жюри шулай ук тавыш режиссурасы һәм музыкаль бизәлеш өчен дә аерым бүләкләр булдыру турында карар кабул итте. Бу яңалык узган елгы жюри рәисе Ресул Пукутти тәкъдиме нигезендә гамәлгә ашырыла.

Шулай ук фестиваль кысаларында кинопроектларның халыкара питчингы старт алды. Чараның максаты – Татарстан белән берлектә кино төшерүне үстерү. Гаризалар тулы метражлы фильмнар һәм вертикаль форматтагы сериаллар категорияләрендә кабул ителә.

Татар-информ