Рөстәм Миңнеханов Төркия Палаталар берлеге делегациясе белән сәүдә һәм инвестицион хезмәттәшлекне киңәйтү мәсьәләләрен тикшерде

Татарстан Хөкүмәте Йортында республика Рәисе Рөстәм Миңнеханов Төркия Палаталары һәм товар биржалары берлеге вәкилләре белән сөйләшүләр үткәрде. Төркия делегациясен әлеге берләшмә президенты Рифат Хисарҗиклыоглу җитәкләде.

Рөстәм Миңнеханов сүзләренчә, әлеге берләшмә ике ил арасындагы эшлекле мөнәсәбәтләрне үстерүдә һәм ныгытуда алыштыргысыз роль башкара. Республика җитәкчесе Татарстанның Россия белән Төркия арасында ышанычлы күпер ролен үтәвен һәм сәүдә-икътисади, инвестицион бәйләнешләргә зур әһәмият бирүен ассызыклады. Ул билгеләп үткәнчә, Төркия Татарстанның иң мөһим чит ил партнерлары исемлегендә ныклы урын алып тора: узган елда ике як арасындагы товар әйләнеше 4,5 миллиард доллар тәшкил иткән.

Очрашу кысаларында яклар киләчәктәге хезмәттәшлекнең төс юнәлешләрен дә билгеләп үтте. Алар арасында автомобиль һәм станоклар төзү, металл эшкәртү, агросәнәгать комплексы, җиңел сәнәгать, төзелеш, туризм һәм мәгълүмат технологияләре өлкәләре бар.

Очрашуның йомгаклау өлешендә Рөстәм Миңнеханов ике як арасындагы дуслыкны һәм хезмәттәшлекне ныгытуга керткән өлеше өчен Рифат Хисарҗиклыоглуга «Дуслык» орденын тапшырды.

Татар-информ