Татарстанда 260 мең кешенең репродуктив сәламәтлеге тикшерелгән

Тикшеренүләрнең төп максаты – киләчәктә йөклелеккә һәм сәламәтлеккә зыян китерердәй авыруларны һәм куркынычларны вакытында ачыклау.

Республика Сәламәтлек саклау министрлыгы мәгълүматларына караганда, агымдагы елда Татарстанда репродуктив сәламәтлеккә багышланган диспансеризациядә 260 934 кеше катнашкан. Әлеге программа халыкның мөһим сәламәтлек өлкәсен тирәнтен тикшерергә һәм төрле куркынычларны иртә этапта ук ачыкларга ярдәм итә.

Сәламәтлек саклау министры Альмир Абашев билгеләп үткәнчә, халык өчен уңайлы шартлар тудырылган: поликлиникаларда махсус зоналар оештырылган һәм кирәкле хезмәткәрләр җәлеп ителгән. Хәзер тикшеренүне эш көннәрендә генә түгел, кичке сәгатьләрдә һәм шимбә көннәрендә дә узарга мөмкин. Министр сүзләренчә, 18 яшьтән 39 яшькәчәгеләр өч елга бер тапкыр, ә 40 яшьтән өлкәнрәкләр ел саен тикшерелергә тиеш. Ул барлык гражданнарны да бу мөмкинлектән файдаланырга чакырды.

Статистика күрсәткәнчә, программада катнашучыларның 49,3 процентын (ягъни 128 783 кешене) хатын-кызлар тәшкил итә. Беренчел кабул итү нәтиҗәләре буенча, һәр икенче хатын-кызга тагын да тирәнрәк өстәмә тикшеренүләр узарга юллама бирелгән.

2026 елда бу мөһим чарага республиканың барлык 45 муниципалитеты һәм 78 медицина учреждениесе кушылды. Диспансеризация яшәү урыны буенча хатын-кызлар консультацияләрендә яки поликлиникаларда үткәрелә. Үзегез белән паспорт һәм мәҗбүри медицина иминияте (ОМС) полисын алырга онытмагыз.

Тикшеренү программасына анкета тутыру, табиблар белән очрашу, репродуктив органнарны УЗИ аша тикшерү, кирәкле анализлар һәм мазоклар тапшыру кертелгән. 

Татар-информ