Татарстанда гаиләләргә ярдәм чаралары киңәйтелә

Татарстанда «Гаилә» илкүләм проектын гамәлгә ашу дәвам итә. Ул балалы гаиләләр санын арттыруга һәм традицион кыйммәтләрне ныгытуга юнәлдерелгән. Республика Хезмәт, халыкны эш белән тәэмин итү һәм социаль яклау министрлыгы хәбәр итүенчә, күпбалалы, аз керемле, студент һәм авылда яшәүче гаиләләргә аерым игътибар бирелә.

Ведомство мәгълүматлары буенча, ярдәм чаралары дистәләгән мең кешене колачлый һәм яшь буынның үсеше өчен уңай шартлар тудыра.

**Балалар бакчасы өчен компенсация**
2026 елда 98,4 меңнән артык ата-ана балалар бакчасы өчен түләүгә компенсация алган: беренче балага — 20%, икенче балага — 50%, өченче һәм аннан соңгы балаларга 70% күләмендә. Моннан тыш, айлык кереме 20 мең сумнан артмаган 10,7 мең гаилә белем бирү оешмаларында бала карау өчен өстәмә компенсациягә ия булган.

**Яшь әниләргә ярдәм**
Авылда яшәүче 666 яшь әни бала туганнан соң бердәм түләү алган. 25 яшькәчә хатын-кызлар беренче баласы өчен — 100 мең сум, 29 яшькәчә өченче һәм аннан соңгы баласын тапкан аналар 200 мең сум ала.

**Балалар өчен социаль чаралар**
3 яшькәчә 1,9 мең сабыйга дарулар сатып алу өчен ел саен 10 мең сум түләнә. Яңа туган 732 бала кирәк-ярак комплектлары белән тәэмин ителгән.

**Күпбалалы гаиләләргә ярдәм**
Бүгенге көндә Татарстанда 59 меңнән артык күпбалалы гаилә исәпләнә. 2026 елда 244,5 мең кеше торак-коммуналь хезмәтләр өчен 30% күләмендә субсидия алган, 73,9 мең укучы юл чыгымнарын каплау өчен айлык субсидиягә ия булган. 6 яшькәчә 42,8 мең бала республика Министрлар Кабинеты раслаган исемлек буенча бушлай дарулар белән тәэмин ителгән.