#Татар-информ 15 апрель 2026, 05:49

Казанда яшүсмерләр арасында деструктив күренешләрне профилактикалау мәсьәләсе тикшереләчәк

15 апрель 2026, 05:49

15 апрель көнне Казанда ата-аналар, педагоглар һәм яшьләр танылган журналист Андрей Медведев белән очрашачак. Чара яшүсмерләр арасында куркыныч күренешләрне булдырмау юлларына һәм аларның психологик иминлеген саклауга багышланачак.

Скопировать ссылку

Очрашу «Белем» җәмгыятенең төбәк студиясендә сәгать 15:00 дә башлана. ТР Мәгариф һәм фән министрлыгының матбугат хезмәте хәбәр итүенчә, чыгыш ясаучы кунак – Россиянең атказанган журналисты, Бөтенроссия дәүләт телерадиокомпаниясе генераль директоры урынбасары, шулай ук «Хыянәт» документаль фильмы авторы Андрей Медведев.

Төп тема – яшь буын арасында деструктив күренешләрне профилактикалау, аларны тискәре йогынтылардан якълау һәм иминлек мәдәниятен формалаштыру. Татарстан мәгариф министры урынбасары Алсу Әсәдуллина билгеләп үткәнчә, әлеге чара ата-аналар һәм педагогларның мөрәҗәгатьләренә җавап итеп махсус оештырылган. Очрашуда катнашучылар яшүсмерләрнең эмоциональ халәтен аңлау, куркыныч билгеләрне иртә стадиядә сизү һәм гаиләдә ышанычлы мохит булдыру мәсьәләләре буенча ачык фикер алышачак.

Татар-информ