#Татар-информ 02 апрель 2026, 13:53

Фәрит Мөхәммәтшин: Тукай мирасы – дөнья мәдәниятенең алтын хәзинәсе

02 апрель 2026, 13:53

Казанда Габдулла Тукайның 140 еллыгына багышланган Бөтенроссия фәнни конференциясендә Фәрит Мөхәммәтшин татар классигының поэтик мирасын глобаль мәдәни кыйммәт дип атады.

Скопировать ссылку

Казанда Татарстан Фәннәр академиясе базасында Габдулла Тукайның тууына 140 ел тулу уңаеннан «Габдулла Тукай коммеморация объекты буларак: дәүләт һәм җәмгыять» темасына зур фәнни форум узды. Чарада галимнәр, җәмәгать эшлеклеләре шагыйрьнең иҗади байлыгын саклау, тарихи хәтерне ныгыту һәм яшь буынга ватанпәрвәрлек тәрбиясе бирү мәсьәләләрен тикшерде.

Конференция катнашучыларын ТР Дәүләт Советының Мактаулы Рәисе Фәрит Мөхәммәтшин котлады. Ул академиягә әһәмиятле чараны оештырганы өчен рәхмәт җиткерде һәм татар галимнәренең Тукай мирасын популярлаштыру, аның халыкара дәрәҗәсен күтәрү юнәлешендәге эшчәнлеген югары бәяләде.

«Туган тел көне һәм бөек шагыйребезнең юбилее алдыннан үткәрелә торган бу очрашуның символик әһәмияте зур. Без Тукайга аның бай мәдәни мирасы өчен рәхмәтле. Аның таланты үткәнне бүгенге һәм киләчәк белән бәйләп, татар мәдәниятен үстерүдә мөһим юнәлеш билгеләде», – дип ассызыклады Фәрит Мөхәммәтшин.

Татар-информ