Татарстан урман хуҗалыгы 2026 елда 12 берәмлек яңа техника алачак

«Экологик иминлек» милли проектының «Урманнарны саклау» федераль программасы буенча, киләсе елда урман хуҗалыгы ихтыяҗлары өчен яңа җиһазлар алу каралган. Бу турыда Татарстан Урман хуҗалыгы министрлыгының техник үсеш һәм милек идарәсе бүлеге башлыгы Нияз Имамиев сөйләде.

Гомумән, 26,2 миллион сумлык федераль акчага 4 урман патруле комплексы (УАЗ нигезендә), 4 «Беларус» тракторы һәм 4 урман плугы алыначак. Нияз Имамиев аңлатканча, патруль комплекслары урманнарны күзәтү, янгын сүндерү чараларын ташу һәм янгын урыннарын сүндерү өчен хезмәт итәчәк. Ә «Беларус» тракторлары җир эшкәртү, урман культураларын тәрбияләү һәм башка хуҗалык эшләрендә алыштыргысыз ярдәмче булачак.

Республикада урманнар җирнең дүрттән бер өлешен алып тора. Ел саен 5 мең гектарга якын мәйданда урманнар торгызыла, ә агачларның үсеп китү күрсәткече 85% тан югары тора. Контроль чараларын көчәйтү нәтиҗәсендә, соңгы өч елда урман хокук бозулары 15%, ә законсыз агач кисү очраклары 27% ка кимегән.