Казанда сукыр һәм начар күрүчеләр өчен «Ак китап» инклюзив проекты старт ала

2026 елның 23 мартында 12:00 сәгатьтә  Татарстан Республикасы Милли китапханәсе мәйданчыгында мөһим социаль чара — «Ак китап» проектының ачылу тантанасы була. Бу вакыйга «Алтын ташбака» Халыкара кыргый табигать фестивале программасына кертелгән һәм 26 апрельгә кадәр дәвам итәчәк.

«Ак китап» — 2019 елдан бирле Мәскәүнең Табигатьтән файдалану һәм экология департаменты ярдәмендә гамәлгә ашырыла торган уникаль инклюзив платформа. Проектның төп максаты — күрү сәләте чикләнгән кешеләргә дөнья матурлыгын тоярга ярдәм итү. Күргәзмәдә дөньяның төрле почмакларыннан килгән иң яхшы фоторәсемнәр 3D тактиль басма технологиясе ярдәмендә тәкъдим ителә. Бу технология рәсемнәрнең рельефлы күчермәсен булдырып, килүчеләргә аларны бармак очлары белән сизеп, «күреп» кабул итәргә мөмкинлек бирә.

Оештыручылар фикеренчә, бу проект — җәмгыятьтә мөмкинлекләре чикләнгән кешеләргә карата киртәләрне җимерүгә һәм комфортлы мохит тудыруга юнәлтелгән мөһим адым. Күргәзмә балаларга үзләрен тулы хокуклы иҗат ияләре һәм шәһәр мәдәни тормышының актив катнашучылары итеп тоярга ярдәм итә. Шулай ук, бу чара ата-аналарга үз балалары белән бергә уңайлы атмосферада вакыт үткәрү, шатлык уртаклашу һәм җәмгыятьнең ярдәмен тою өчен дә уникаль мөмкинлек булып тора, дип хәбәр итә «Татар-информ».