Казанда 15 яшьлек питбайкер имгәнде: Минск урамында җиңел автомобиль белән авария узды

Казанның Минск урамында юл-транспорт һәлакәте теркәлгән: 15 яшьлек яшүсмер питбайк белән идарә иткәндә җиңел автомобиль белән бәрелешкән. Бу хәл узган якшәмбедә булган, дип хәбәр итте  дәүләт автоинспекциясе.

Автоинспекция бүлеге җитәкчесе Айрат Хәмидуллин аңлатканча, Haval йөртүчесе ике катлы тоташ линия аша борылыш ясаган вакытта каршы якка хәрәкәт иткән питбайк белән бәрелешкән. Үсмернең транспорт чаралары белән идарә итү хокукы булмаган, шуңа күрә питбайк махсус стоянкага озылган. Юл-транспорт һәлакәте нәтиҗәсендә балигъ булмаган йөртүче төрле дәрәҗәдәге тән җәрәхәтләре алган.

Ведомство вәкилләре искә төшергәнчә, питбайк — бары тик спорт инвентаре, аны куллану махсус мәйданчыкларда һәм тренировкалар вакытында гына рөхсәт ителә. Гомуми файдаланудагы юлларда, шул исәптән юл кырыйларында һәм тротуарларда питбайк белән йөрү катгый тыела.

Исегезгә төшерәбез: скутер яки мопед белән идарә итү өчен «А1» категорияле таныклык һәм 16 яшь тулу таләп ителә. Ә мотоцикл йөртү өчен 18 яшькә җитү, «А» категориясе булу һәм транспорт чарасын иминиятләштерү шарт.