Татарстанда урманнарны торгызу өчен финанслау 2026 елда 1,5 тапкыр артачак

2025 елда Татарстанда 5335 гектар мәйданны урман торгызу һәм утырту эшләре узды. Бу эшләрнең зур өлеше «Экологик иминлек» илкүләм проектының «Татарстан Республикасында урманнарны саклау» төбәк компоненты кысаларында башкарылды, — дип хәбәр итте Татарстанның Урман хуҗалыгы министрлыгы.  

Төбәктә 2800 гектар мәйданда урман яңартылды, шуларның 1600 гектары илкүләм проект чаралары нәтиҗәсендә. Шулай ук 2002 гектар мәйданда саклагыч урманнар утыртылды, ә 533 гектарда компенсацион урман торгызу һәм үрчетү эшләре үткәрелде.  

Министр Равил Кузюров әйтүенчә, илкүләм проектның бөтен күрсәткечләренә ирешелде: киселгән һәм югалган урман мәйданына карата торгызылган урманнар 150% тәшкил итте —бу планлаштырылган нормадан күбрәге. Ел дәвамында урман булдыручы төп токымнар өчен 12 тоннадан артык орлык әзерләнде, дип хәбәр "Татар-информ".