#Татар-информ 29 октябрь 2025, 13:10

Фәрит Мөхәммәтшин Светлана Захаровага Татарстанның балалар буенча омбудсмены таныклыгын тапшырды

29 октябрь 2025, 13:10

Светлана Захарова— Татарстанның рәсми балалар омбудсмены. Аңа бүген Дәүләт Советы Рәисе Фәрит Мөхәммәтшин тарафыннан вазифасын раслаучы таныклык тапшырылды.

Скопировать ссылку

ТР Дәүләт Советы Рәисе Фәрит Мөхәммәтшин Светлана Захаровага Татарстан Республикасының Бала хокуклары буенча вәкаләтле вәкиле вазифасына керешүен раслаучы таныклык тапшырды. Хәбәрне ТР Дәүләт Советының матбугат хезмәте яза.

Исегезгә төшерәбез, Светлана Захарованың кандидатурасы Дәүләт Советы депутатлары тарафыннан 25 сентябрьдә узган утырышта якынча бертавыштан хупланып, шул ук көнне ул ант биреп, яңа вазифасына керешкән иде.

Фәрит Мөхәммәтшин яңа балалар омбудсменына эшендә уңышлар теләде.

Яңа вазифага билгеләнче Светлана Захарова Дәүләт Советына дүрт тапкыр депутат итеп сайланган (4-че, 5-че, 6-чы һәм 7-че чакырылышлар) һәм Социаль сәясәт комитеты рәисе вазифасын башкарган.