Татарстанда илкүләм проект буенча өлкән яшьтәгеләрне медицина оешмасына бушлай йөртәләр

ТР Хезмәт, халыкны эш белән тәэмин итү һәм социаль яклау министрлыгы матбугат хезмәте хәбәр иткәнчә, өлкән гражданнарны йөртә торган махсуслашкан транспорт сәламәтлек мөмкинлекләре чикле кешеләргә яраклаштырып җиһазландырылган.

Әлеге хезмәт Россия Президенты Владимир Путин инициативасы белән гамәлгә ашырылучы «Демография» илкүләм проектының «Өлкән буын» федераль проекты ярдәмендә күрсәтелә. Ул өлкән яшьтәге кешеләрнең тормыш сыйфатын күтәрүгә, актив озын гомер яшәү өчен шартлар тудыруга (һ.б.) юнәлдерелгән.

Мәсәлән, узган ел халыкка социаль хезмәт күрсәтү комплекслы үзәкләре белән медицина учреждениеләренең хезмәттәшлеге нәтиҗәсендә 61,7 мең татарстанлы район хастаханәләрендә тикшеренеп һәм дәваланып кайткан.

2024 елда әлеге медицина хезмәте белән якынча 57 мең гражданны колачларга планлаштырыла. Әйтелгәнчә, 36 меңнән артык кеше аңардан файдаланган инде.

Тулырак: https://tatar-inform.tatar/news/tatarstanda-ilkulam-proekt-buenca-olkan-yastagelarne-medicina-oesmasyna-buslai-iortalar-5891252