Татарстан Республикасы Рәисе Рөстәм Миңнеханов Казанда төзеләчәк объектлар турында сөйләде

«Без республика башкаласы өчен әһәмиятле проектларны гамәлгә ашыруга керештек: Казансу ярында Милли китапханә белән янәшә балалар паркы, шулай ук Галиәсгар Камал исемендәге Татар дәүләт академия театрының заманча яңа бинасы төзелә. Ул Кабан күле экосистемасын һәм Иске Татар бистәсен берләштерер, матур архитектура объекты һәм татар мәдәнияте үзәге булыр дип уйлыйм», - диде ул Дәүләт Советына юлламасында.

 Киров дамбасы буендагы территория кунакларны җәлеп итү урыны булыр дип көтелә.

«Биредә су өстендә йөрү һәм ял итү өчен яңа төзекләндерелгән иҗтимагый киңлек барлыкка киләчәк. Шәһәр институты Казан мэриясе белән берлектә тиешле планны эшләүгә керешергә тиеш», - диде Рөстәм Миңнеханов.

Татар-информ