Татарстанлыларны хезмәт хакын конвертларда алмаска өндиләр

Россия Федераль салым хезмәтенең ТР буенча идарәсе пенсия, больничный кәгазьләрен исәпләү, дәвалануга, укуга, торак сатып алуга каралган салым вычетларын исәпләү рәсми хезмәт хакы буенча гына башкарыла, дип искәртә. Шуңа күрә ведомство хезмәт хакын конвертларда алуга килешмәскә киңәш итә. 

Шулай итеп, 2021 елның 9 аенда хезмәткәрләргә хезмәт килешүе төземичә генә хезмәт хакын конвертларда түләгән 2300 эш бирүче белән эш алып барылган. 2 меңнән артык шундый эш бирүче үз карарларын яңадан карады һәм хәтта хезмәт хакларын да арттырды. 

Татарстанлылар «халыкның формаль булмаган мәшгульлеге», «конвертлы түләүләр» мәсьәләләре буенча Федераль салым хезмәтенең ТР буенча идарәсе (8 (843) 235-18-38 телефоны буенча яки Россия Федераль салым хезмәтенең Бердәм Контакт-үзәге телефоны (8-800-222-2222) буенча мөрәҗәгать итә алалар.