Татарстанда беренче тапкыр зоотехник-селекционерларның бөтенроссия конкурсы узачак

7 июньнән 11 июньгә кадәр Татарстанда «Элита»  базасында сөт һәм ит терлекчелеге зоотехник-селекционерларының 2 нче бөтенроссия конкурсы узачак. Бу хакта чараны оештыру комитетының беренче утырышында хәбәр иттеләр.

Киңәшмәдә Россия Федерациясе авыл хуҗалыгы министрлыгының терлекчелек һәм нәсел эше директоры Дмитрий Бутусов, Татарстан республикасы авыл хуҗалыгы һәм азык-төлек министры урынбасары Ленар Гарипов, Татарстан республикасы авыл хуҗалыгы һәм азык-төлек министрлыгының терлекчелектә нәсел эше буенча баш дәүләт авыл хуҗалыгы идарәсе башлыгы Ришат Зарипов һәм башка җаваплы затлар катнашты.

Конкурс түбәндәге номинацияләр буенча оештырылачак: «Зоотехник-селекционер 2021» конкурсы чемпионы, «Автоматлаштырылган мәгълүматлар базалары белән практик эш», «Хайваннарның нәсел кыйммәтен бәяләү», «Теоретик белемнәр», «Зоотехника хезмәте ветераны», «Булачак селекционер», «Нәсел эшен үстерүгә керткән өлеше өчен» һәм «Эшкә мәхәббәт өчен» номинацияләре призерлары билгеләнәнчәк, шулай ук Д.А. Кисловский исемендәге күчмә кубок тапшырылачак.

Катнашучылар үзләренең автоматлаштырылган мәгълүматлар базалары белән эшләү һәм хайваннарның нәсел кыйммәтләренә бәя бирү буенча практик күнекмәләрен күрсәтергә, шулай ук тест узарга тиеш булачак.

Катнашу өчен гаризалар 15 майга кадәр Rishat.Zaripov@tatar.ru электрон почтасына  кабул ителә тулырак мәгълүматны 8(843)221-77-58 телефоны буенча белергә мөмкин.