“Пятерочка”дан “Татмедиа” басмаларын алу мөмкин булачак

“Татмедиа” медиахолдингы “Пятерочка” сәүдә челтәрендә вендинг автоматлары урнаштыру юлы белән газета һәм журналлар сата башлый. 

Х5 Retail Group белән хезмәттәшлек башлануы турында бүген “Татмедиа” генераль директоры Шамил Садыйков Татарстан президенты Рөстәм Миңнехановка докладында хәбәр итте.
“Без Х5 Retail Group белән хезмәттәшлек формасын таптык, аларда вендинг автоматлары урнаштырачакбыз”, — диде Садыйков.

“Татмедиа” генераль директоры медиахолдинг 2020 ел башыннан бирле басма продукцияне сатуның яңа формаларын актив үзләштерә, шуның нәтиҗәсендә газета һәм журналларны сату күләме 75% ка артты, дип аңлатты. 2020 елда “Татмедиа” басмаларын сату нокталары саны 25% ка арткан, бүген алар бөтен республика буенча 1,1 меңнән артык.

Татар-информ