Әлмәт балалар бакчаларында ГТО фестивале узды

Узган ялларда инде 7 ел рәттән «Яшь ГТОшкалар 2024» спорт фестивале узды. Чара  мәгариф идарәсе,  физик культура һәм спорт идарәсе белән берлектә үткәрелде. 6-7 яшьлек балалар үзләренең көчләрен, җитезлекләрен һәм чыдамлыкларын күрсәтү өчен бергә җыелдылар.

Фестивальнең гранд финалына эләгү өчен мәктәпкәчә балалар учреждениеләре сәламәт яшәү рәвешенең файдасы һәм ГТОга уңай мөнәсәбәт турында видеоролик төшерергә тиеш иде.  Фестивальнең финалында 19 мәктәпкәчә белем бирү учреждениесе иң яхшылар исеме өчен көрәште. Балалар бакчасы командалары ВФСКның «Хезмәткә һәм оборонага әзер» нормативларын үтәделәр.

Фестивальдә барлыгы 300 дән артык кеше катнашты. Җиңүне 22 нче «Алсу» балалар бакчасы яулады, икенче урында 50 нче «Ләйсән» балалар бакчасы, өченче урын 56 нчы «Крепыш» балалар бакчасы булды.

Җиңүче командаларга кубоклар, дипломнар, спорт кибетеннән, партнерлардан  сертификатлар тапшырылды.

Ярышларда катнашучыларның һәркайсы бүләк алды, ә бакчаларга дипломнар бирелде, дип хәбәр итә оештыручылар.