Бастрыкин Әлмәттә ятимнәрне торак белән тәэмин итү белән бәйле вәзгыятьне контрольгә алды

Сәбәбе Россия Тикшерү комитетының Мәгълүмати үзәгенә килгән мөрәҗәгать. Анда 2019 елдан бирле торакка мохтаҗлар исәбендә торучы ятимнәр әлегә кадәр закон буенча тиешле фатирлар алмаган, дип хәбәр ителә. Мөрәҗәгать итүчеләр сүзләренчә, төрле инстанцияләргә күпсанлы мөрәҗәгатьләр нәтиҗә бирмәгән.

Әлеге факт буенча Татарстанның тикшерү органнары тарафыннан җинаять эше кузгатылган.

Александр Бастрыкин Россия Тикшерү комитетының Татарстан буенча Тикшерү идарәсе җитәкчесе Валерий Липскийдан тикшерү барышы һәм ятимнәрне уңайлы торак белән тәэмин итү чаралары турында мәгълүмат сорады.

Йөкләмәнең үтәлеше Тикшерү комитетының үзәк аппаратында контрольгә куелды.