29 октябрь — Комсомолның туган көне

Бәйрәм ел саен 29 октябрьдә билгеләп үтелә. Бу бәйрәмнең булдырылуына инде йөз елдан артык вакыт узган — ул үзенең тарихын 1918 елдан башлый. 
Әлмәт районында комсомол оешмасы тарихына кагылышлы вакыйгалар турында каләм-дәшебез Әлфия Ярмиева «Әлмәт җире яшьләре» - «Молодежь альметьевской земли» кита-бында бик матур итеп язып калдырган. 
Тарих битләренә күз салсак, Әлмәт авылында беренче комсомол конференциясе 1931 елның 2 сентябрендә үткәрелгән. Анда Әлмәт комсомол райкомы сайлана. Ул үз эченә 21 беренчел оешмаларны берләштерә, аларда ВЛКСМның 369 әгъзасы исәптә тора. 
Район комсомол оешмасы конференциясе карары белән комсомоллардан, профсоюз әгъзаларыннан 8 штурм бригадасы оештырыла һәм авылларга җибәрелә. Биредә алар колхозларда зур эш алып баралар. Аякка басу чорында кыенлыклар күп була, әлбәттә. Шулай да Әлмәт районы колхозлары 30 нчы елларның икенче яртысында әкренләп көч җыя башлыйлар. Элек колхозчыларның хезмәтенә аз түләнсә, 1937 елда хезмәт көненә 8-10 кг ашлык, шулай ук яшелчә һәм бал бирү карала. Терлекчелектәге уңышлары өчен «Ирек» (Габдрахман авылы), «Актау» (Кичүчат авылы), Бишмунча авыл советының «Туры юл», Куйбышев исемендәге хуҗалыкларыннан берничә колхозчы Бөтенсоюз авыл хуҗалыгы күргәзмәсендә катнашу өчен кандидатлар итеп күрсәтеләләр.
Әлмәт авылы Әлмәт шәһәре итеп үзгәртелү сәбәпле, 1953 елның ноябрендә ВЛКСМның Әлмәт шәһәр комитетын төзү турында карар кабул ителә. Аның составына 75 башлангыч оешма керә. Әлмәт комсомолы данлыклы шәхесләрен дөньяга таныта. Комсомолчыларның күбесе фашистларга каршы көрәштә күрсәткән батырлыклары өчен Советлар Союзы Герое исеменә лаек була. Мотыйк Әхмәтҗан улы Әхмәдуллин, Никита Евдокимович Токарликов, Гарәфетдин Сәлахетдин улы Сәлахетдинов һәм Корбан Тимергали улы Тимергалиев кебек каһарманнар Дан орденының тулы кавалерлары буларак тарихка кереп калга-ннар. 
Без белгән күп кенә җитәкче-ләрнең эшчәнлеге комсомол оешмасыннан башланган. Комсомоллар илнең җимерелгән халык хуҗалыгын торгызуда, колхозлар тормышын алып баруда актив катнашалар, удар төзелешләрдә эшлиләр, спортны, мәдәниятны үстерүдә һәрвакыт алдынгы рәтләрдә булалар. Әлмәт комсомол оешмасы заманында республикада иң яхшысы дип санала.