Әлмәттә Питер рәссамының өч метрлы «Великан» скульптурасы урнаштырылачак

Әлмәттә Петербург рәссамы Андрей Люблинскийның «Великан» скульптурасы ачылачак. Аны «Татнефть»нең «Алтын алма турында әкиятләр» дип аталган биш еллык паблик-арт программасы кысаларында урнаштырдылар. Бу хакта проектның оештыру комитетында сөйләделәр.

9 июньнән Төзүчеләр проспектындагы 63 нче йорт янындагы скверда монтаж эшләре алып барыла. 14 июньгә кадәр өч ярым метр биеклектәге металл скульптураны урнаштыруны тәмамларга тиешләр.

Объект Мәскәү рәссамы Сергей Соболевның «Радиолярия» эше һәм Максим Свищевның «Яблоня» скульптурасы белән беррәттән «Алтын алмалар турында әкиятләр» программасының бишенче, финал сезоны кысаларында ясалган өч финал скульптурасының берсе булачак.

Андрей Люблинскийның скульптура төркеме концепциясе кайчандыр Әлмәт җирләрендә батырлар яшәгән дигән ышануга нигезләнгән. Арт-объект үзең һәм якыннарың турында кайгырту  һәм иминлек хисе темасына багышланган.

Андрей Люблинский сөйләвенчә, эшне ясау өчен аны Кичучат авылында яшәүчеләрнең кайчандыр бу җирләрдә яшәгән зур кешеләр турында истәлекләре турында сөйләве илһамландырган. Риваять буенча, алар шулкадәр озын һәм көчле булганнар ки, агачлар аларның аякларына энәләр кебек кадалганнар.

«Алтын алмалар турында әкиятләр» проекты командасы катнашучы рәссамнарга җирле риваятьләргә, локаль контекстка, тарихи фактларга таянып, эшләр ясарга тәкъдим итә, яңа скульптура шәһәр халкының арт-маршрутына гармонияле рәвештә туры килер һәм аларны үз мәгънәсе белән сөендерер дип өметләнәм», — диде ул.

Андрей Люблинский дизайнер, скульптор, куратор, Россия Рәссамнар берлеге әгъзасы, Мәскәүнең Горький паркында «Желтый утенок», Пермьдә «Красные человечки» сәнгать проектлары, ВДНХда Халыклар дуслыгы масштаблы инсталляциясе авторы. Ул Россия, Европа һәм АКШта шәхси һәм коллектив күргәзмәләрдә катнаша.

«Алтын алмалар турында әкиятләр» программасы кысаларында Әлмәттә Мәскәү рәссамы Сергей Соболевның «Радиолярия» скульптурасы урнаштырылды. Июнь аенда Әлмәттә тагын бер яңа арт-объект-Петербург рәссамы Максим Свищевның «Яблоня» кинетик скульптурасы барлыкка киләчәк.

Фото: Алтын алмалар турында әкиятләр

Чыганак