Авыллар Яңа елны «бизәнеп» каршылый

Авыл җирлекләренә кунакка барсаң, анда сине Кыш бабай, Кар кызы һәм тагын башка күптөрле әкият геройлары каршы ала.

Матур күренеш пәйда була - могҗизалы әкият иленә эләккәндәй буласың. Йорт тәрәзәләре, капка төпләре аллы-гөлле утларга күмелгән, нинди генә кар сыннары юк. Авыл халкының фантазиясенә, осталыгына хәйран калып торасың. Авылларның иң актив кешеләре, укытучылар, укучылар, мәдәният, авыл советы хезмәткәрләре иҗаты һәркемне сокландыра.

Әйләнә-тирәне бизәү буенча бәйге Әлмәт җирлегендә инде берничә ел рәттән оештырылып килә. Бәйгегә шушы көннәрдә йомгак та ясалган. Беренче урынны быел Яңа Кәшер авыл җирлеге яулаган. Икенче урында - Борискино авыл җирлеге, ә менә өченче урынга Елховой авыл җирлеге лаек дип табылган. Без аларны бу җиңүләре белән котлыйбыз.

Авыл җирлекләрендә төрледән-төрле  бәйрәм чаралары да үткәрелә башлаган инде.

Тик шуны да искәртеп узасы килә, зур тырышлык куеп ясалган сыннарны ватып китүчеләр дә юк түгел. Андыйлар ке-ше хезмәтен хөрмәт итсеннәр иде, дип искәртү артык булмас. Авыл халкы  ясаган сыннар әле язга кадәр тирә-юньгә матурлык өстәп торсыннар иде.

Бүгенге катлаулы һәм борчулы чорда бераз күңел ачып алу да бик кирәк. Иң мөһиме - балаларыбыз куансын. Нәрсә дисәң дә, Яңа ел - үзенчәлекле бәйрәм, ул балачакка кайту һәм кабат тылсымга ышану вакыты бит.

Резеда Исмәгыйлева