Олы юллар сезне чакыра…

Борчылып, йокысыз төннәр үткәргән укучылар да, әти-әниләр дә иркен сулыш алды.

Район һәм шәһәр мәктәпләренең чыгарылыш сыйныф укучылары кулларына өлгергәнлек турында аттестатлар алдылар. Авыл һәм шәһәр мәктәпләрендә шаулап-гөрләп чыгарылыш кичәләре уза. Мәктәпне тәмамлаган егет-кызларны алда зур тормыш көтә.

Чыннан да, быел имтихан нәтиҗәләре начар булмаган. Бердәм дәүләт имтиханын 959 укучы биргән. Нәтиҗәләр, әлбәттә, төр-лечә. Араларында аерым фәннәр буенча йөз балл җыючыларның булуы аеруча куандыра. Мисал өчен, җәмгыять белеменнән республика буенча 13 бала имтиханны шушындый югары баллга тапшырган булса, шуның икесе - Әлмәтнеке. Бу 6 нчы һәм 25 нче мәктәп укучылары. Татарстанда физика буенча ике укучы йөз балл җыйган булса, шуның берсе - Әлмәтнең 16 нчы мәктәбе укучысы! Тагын ике бала - 7 нче мәктәп һәм 5 нче гимназия укучылары инглиз теленнән йөз балл җыя алганнар.

Район һәм шәһәр мәктәпләре укучылары арасында төрле олимпиадаларда, бәйгеләрдә катнашып, призер булганнары да шактый күп. Бу турыда 2 июль көнне шәһәркүләм узачак чыгарылыш кичәсендә тулырак мәгълүмат бирәчәкләр әле. Ә хәзергә шуны гына ассызыклап узасы килә, бу күркәм нәтиҗәләр - ел дәвамында әти-әни-ләрнең, укытучыларның, укучыларның, шушы чор-ның җаваплылыгын аңлап, киләчәк тормышларына битараф булмыйча, тырышып әзерләнүләре нәтиҗәсе.

Чыгарылыш сыйныф укучыларының барысына да сәламәтлек, уңышлар һәм ак юллар теләп калабыз. Иҗади сәләтегез сезгә барлык хыял-омтылышларыгызны тормышка ашыруда ярдәм итсен!

Резеда Исмәгыйлева