Татарстанда респиратор инфекцияләргә каршы көрәш өчен 3,5 мең урын бар

Татарстанда йогышлы авырулар, шул исәптән яңа коронавирус йогышы белән көрәшү өчен 3,5 мең койка җәелдерелгән. Бу хакта «Татар-информ» мәгълүмат агентлыгында узган матбугат конференциясендә республиканың сәламәтлек саклау министры урынбасары-Казанның Сәламәтлек саклау идарәсе башлыгы Владимир Жаворонков хәбәр итте.

Искәртеп узабыз, бүген ТР сәламәтлек саклау министры Марат Садыйков республикада кирәк булган саен, коронавирус белән авыручылар өчен оператив рәвештә җәелдерергә мөмкин булган 1,2 мең резерв койка әзерләнүе турында сөйләде.

Владимир Жаворонков аңлатканча, бу урыннар стационарларның койка фондын яки аның функционалын үзгәрткәндә барлыкка килергә мөмкин.

"Бу 1,2 мең урынга әзер госпиталь түгел", - дип тәмамлады министр урынбасары.